terug

Terf

Druimentaere

Wie ich nag waekeliks dizze druimentaere inne Limburger móch sjrieve, deej ich det oeëts 'ns euver meis; 't gewas det volges de Dieke van Dale in good Nederlands es maïs of es mais gesjreve moog waere. Waat det betruf höbbe v'r 't hie 'n hieël sjtök mekkeliker; meïs mit puntjes oppe 'i' guf 't zich hie neet. Diek tieën jaor geleje verwónjerdje ich mich in dae column den ouch neet euver die twieë meugelikheje óm meis te moge sjrieve. Ich vroog mich get aaf waat, in idder geval veur mich, jaor nao jaor 'n raodsel is gebleve. Wie kin 't toch det de meis ane randj altied kleiner blief es de meis dae 'n rie of vief zès vanne kantj aaf ligk.

Sjtad en landj zóch ich nao 'n verklaoring en höb de meis oeteinloupendje euver meis euver mich haer laote kómme. D'n eine vertèldje mich det 't ane renj helder zów wejje, 'ne angere dach det bie 't mès vare de kentjes gemeinlik get minder bedeildj waere. 'ne Derdje dach det 't ane renj van 'n veldj get vóchtiger is en det meis neet van nate veut hèltj. 'ne Echte boer wis mich te vertèlle det de meis in 't midde waal helder mót greuje óm ouch 'n bietje vanne zón te kinne genete. Ich vónj 't allemaol waal get höbbe, euvertugendj is aevel 'n anger categorie.

Aafgeloupe sjoeëlvakantie móch ich op 'ne hóndj passe en det woor dus twieë kieër daags 'n wanjeling door de Waerd. Naeve 't zjwumbad euver 't brökske en oppe sjplitsing leet ich de hóndj keze of v'r links ómhoeëg en rechs trök of ómmesang lepe. 't Maakdje neet oet wie v'r lepe, aan beidskenj lepe v'r aan 'n paar hectare gewas langs wovan ich aannoom det 't mit zien al behuuërlik óntwikkeldje korrels en sjoeën baerdjes zoeëmer Triticum aestivum zów kónne zeen. De Nederlenjers numme 't tarwe en in Lin zègke v'r terf. 't Loog d'r allemaol aeve sjoeën gelp bie mer ein dink veel mich op. Neet allein meis is veur mich nag altied ónbegriepelik kleiner ane ane renj, ouch terf bedeentj zich van die eigeste trèkskes. Ein prangendje vraog is nao twieë waeke wanjele blieve hange: wiezoeë?

Allè,

Jan Sjure,

reagere: jan.sjure@druimentaere.nl


Deel dit bericht: