Boeks of rok

Ich weit neet of g'r 't verhaol van Matilda oeëts gelaeze höbtj, mer dit meisterwerk van Roald Dahl is mit van't leukste book veur kinjer det ich kin. In 't origineel hètj de directrice van Matilde's sjoeël miss Trunchbull; in de vertaaldje versie is ze juffrouw Bulstronk. 't Is ein vanne grótste 'kernaaljes'* die ich in al waat ich oeëts 'ns loos bön taegegekómme. Die juffrouw Bulstronk koom ich lès weer 'ns taege op 'n cartoon oppe websjtek van BNNVARA. Marjolein Faber, minister van asiel en migratie, wórt vergeleke mit die 'krak', 'duvelsmoeër', 'megochel', 'toeëj', 'sjrapnel', 'sjroet', 'sjnep', 'kets' of 'hieëp'* van Bulstronk.

Zaoterdig loos ich inne gezèt det de waek vanne waorheid d'r veur minister Faber aan sjtóng te kómme. Ouch in det artikel koom ich de vergelieking mit juffrouw Bulstronk taege. Noe kin ich minister Faber nag neet ech good, mer höb zoeë mien bedinkinge nao alles waat ich d'r euver en van höb moge zeen en huuëre. Óm häör noe aevel al drek mit juffrouw Bulstronk te vergelieke, geit mich net 'n brökske te wied. In det artikel sjtuuërdje ich mich aevel aan 'n paar anger opmerkinge: "cultfiguur Faber vèltj op door häör biezunjer kleiing" en " Faber, vriewaal altied gehuldj in 'n jeske en 'ne rok".

Allewiel mót alles genderneutraal zeen. V'r waere gecorrigeerdj es v'r 'bemanning' in plaats van 'bemiensing' sjrieve. Inne trein en oppe sjtaasje huuërs se neet mieër "dames en hieëre" ómrope mer "bèste reizigers". Apaarte wc's veur dames en hieëre moge gaondjeweg neet mieër ómdet idderein es zichzelf zien behoeftes mót kónne doon. Mer waat is d'r in godshieërsnaam noe zoeë bezunjer aan 'n vrouw die 'ne rok aan haet óm det sjpecifiek inne gezèt te benumme? In de diek zevetig jaor det ich mien moder kin, höb ich häor nag noeëts in 'n boeks zeen loupe. Wo is d'n tied det Martin Bril 't waord 'rökskesdaag' publiek maakdje? Sjtèltj uch 'ns veur det g'r mörge inne gezèt zówtj laeze det minister-president Schoof 'n persconferentie goof en det d'r det, wie bekans altied, deej mit 'n jeske en 'n boeks aan.

Allè,

Jan Sjure,

reagere: jan.sjure@druimentaere.nl


* Zoeëmer get bekans vergaete Linder wäörd veur 'n vreselik vroumes oet 'de taal van Lin'.

Deel dit bericht: