Dae ligktj

Wiewaal ich woonsdig toch ech twieë maol drie keteer höb zitte kieke nao èlf sjpelers in 'n oranje truitje die zich veurnamelik sjtap veur sjtap euver 't veldj bewaoge, huuërdje ich de commentator 'n paar keer zègke: "oranje löp neet". Óndanks det 't wèrkwaord 'loupe' 'n neet mis te versjtaon beteikenis haet, wurtj 't döks figuurlik gebroektj veur gans get anges. 't Water löp neet door of löp mich inne móndj, de bandj löp laeg, de kèrke loupe laeg, de film löp good aaf, wie löps doe d'r bie, de sjaaj leep inne miljoene.

Wie ich mich disdaag 'ne nuje trui koch, huuërdje ich de verkuipster zègke det de kluuër mich good sjtóng. Ich sjtóng inderdaad mer leet sjtäöndje wete det dae trui ouch lekker zoot. Sjtaon en zitte laote nieks aan dudelikheid te winse euver, dae nuje trui aevel sjtóng en zoot veurnamelik figuurlik good. Det sjtóng zjwart op wit; wie sjtuitj 't laeve; ze zoge 't neet mieër zitte. "Die zitj", leet de Ingelse aanhang inne allerlèste minuut wete, mer die goal zoot 't hieël oranjelegioen neet lekker.

Ligke is ouch zoeë'n waord. Hae lag de bal in 't uterste heukske, mer 't woor k'rdju toch ech door te trappe det dae Ollie ós det aandeej. En waat det aandoon betruf, v'r sjtónge d'r woonsdigaovendj in ós paosbèste oranje op, dao kós gènne oet ziene bol gaondje Ingelsman get aan verangere. 't Loog toch ech aan ós zelf det v'r de kans oppe finale in Dortmund höbbe laote ligke. Ligke kóns se ouch in 'n sjeiing; 'n fabriek kin plat ligke; doe kins emes rechs laote loupe en links laote ligke; veur pampus ligke, al zits of sjtuis se oere weg van det eilendje.

Mörgemiddig, Quatorze Juillet, geit d'r op Maarteshaof ouch hieël get ligke. Op 't jeu-de-boulestoernooi det 't Lèste Tikske dao organiseertj gaon 'dae ligktj' waarsjienlik de twieë meis gehuuërdje wäördjes zeen. En wiewaal d'r nao idder rundje twelf bel in of oppe baan ligke, is 't d'r mer eine 'dae ligktj'. En al ligke die èlf anger bel nag zoeë sjtil, de bal dae ligktj, is de bal wo alles óm drejtj.

Allè,

Jan Sjure,

reagere: jan.sjure@druimentaere.nl