De nuje

Ich zów 't geweldig vinje es se zaoterdig ouch nao de Hermenie kums. 't Oetrope begintj óm 21:45 oer. Den wurtj 't fieës! Groete. De nuje vanne Kwekkerte. Dit berichske kreeg ich gister óm 11:11 oer. En mit mich wórte waarsjienlik nag hieël get Linnenieëre d'r gistermörge óm 11 op 11 aan herinnerdj óm vanne oetreuping van dae nuje getuge te zeen.

'n Opvallendje oetnuuëdiging van 'ne nag opvallendjer anonieme nuuëjer. Zien telefoonnummer koom in mien belgegaeves neet veur. Ich sjrief 'zien' en neet 'häör' en num daomit mer aeve aan det de Kwekkerte gèn prinses gaon oetrope. Waat mich aevel 't meis opveel aan 't berichske woor det ich in 't Nederlands wórt genuuëdj. Woonsdig sjtóng in dit Linner Nuuts 'n berichske det mich al 'n bietje deej riejere: 'nog mèr 3 nachtjes'. 't mich ónbekindj wäördje 'mèr' deej mich vermoede det dit 'n poging woor óm get (nag mer 3 nechskes) in 't Lins op papier te kriege. In de paar wäördjes teks in 't filmke 'de verraojers' op dit eigeste Linner Nuuts, vónj ich mer leefs 7 aanwiezinge det de sjriever op z'n zaochs gezag 't Lins sjrieve neet ech beheersdje.

Mer los van mien geneuzel euver zien gesjreve al den neet Lins, vónj ich zien berichske op miene telefoon gister geweldig creatief, inventief en innovatief. Det belaoftj 'ne geweldige veurgenger dit seizoen en ich feliciteer de Kwekkerte op veurhandj al mit häöre nuje Prins. En dae nuje beej ich bie deze aan óm alles waat hae 't kómmendj seizoen aan gesjreve Lins ane vrouw, man, Kwekkert, Kwaker of Kuulkop wiltj bringe, gratis en veur nieks in good Lins op papier te zètte.

Bèste nuje vanne Kwekkerte,

mien mobiel nummer höbs se al en mien e-posadres sjtuit ónger dit sjtökske.

Allè,

Jan Sjure,

reagere: jan.sjure@druimentaere.nl