Gaetje

Wie ich oeëts 'ns idder waek dizze column inne Limburger móch sjrieve, veuldje ich mich neet beperktj in wo 't idder waek euver ging. Noe ich idder waek in 't Linner Nuuts 'n sjtökske sjrief, probeer ich hie zoeë väöl meugelik inne buurt te blieve. Zoeë noe en den aevel gebeurtj d'r 'ns get wo se neet aan naeve kóns en wils gaon. Num beveurbeeldj alles waat aafgeloupe waek in Amsterdam gebeurdj is en ós daonao nagal bezig heel.

Mich brach 't allemaol jaore trök nao d'n tied det ich nag wèrkdje en 'n waekske mit 'ne Ingelse en 'ne Amerikaanse collega op sjtap woor. V'r wore twieë daag in Israël gewaes en de volgendje sjtap woor Saudi-Arabië. Ómdet d'r gèn directe vluchte wore, vloge v'r ieës nao Roeëme. En ómdet se mit 'n Israëlisch sjtempel inne pas flink get höbs oet te lègke es se de Saudi's wils bezeuke, wórt op 'n twieëdje paspaort gevlaoge. V'r wórte d'r allerherteliks óntvange, hejje 'n fantastisch hotel, krege 'n vorstelik diner aangebaoje en hejje nieks te klage. Sjmörges wórte v'r aafgehaoldj en nao 'n kamer gebrach wo v'r daen daag zówwe vergadere.

Ós aandach wórt getrokke door 'n behuuërlik groeëte werreldkaart die bekans 'ne ganse wandj bedèkdje. Waat ós aevel 't meis opveel woor 'n klein besjadiging op die kaart. Oppe plek wo Israël hej mótte ligke, woor 'n klein gaetje gemaakt. 'n Gaetje groeët genóg óm Israël vanne kaart te haole. Twieë daag nao 'n indrökwekkendj bezeuk aan Jeruzalem en Tel Aviv bepaoldje det gaetje veur mien collega's en mich de res van ós verblief dao. 't Woor d'r waarsjienlik mit 'n metske oetgekratsj mer 't koom aan wie 'n bóm. Ich weit nag wienieë 't woor, 20 juni 1994, Nederlandj sjpeeldje dae daag op 't WK taege Saudi-Arabië. Alles waat diswaek in Amsterdam en inne Twieëdje Kamer gebeurdje, brach mich trök nao 'n verrèkdjes klein mer 'n verrèkdjeser pienlik gaetje op 'n werreldkaart in Riyad diek dertig jaor geleje.

Allè,

Jan Sjure,

reagere: jan.sjure@druimentaere.nl

* al die columns en 'n deil anger sjrieverieje zeen gebunjeldj in:

'ram gedruimentaerdj ...en nag alles op 'n rie'. Te koup veur € 34,95.