Geluive

 

In miene bokekas sjtaon hieël get beuk die 't taegedeil bewieze mer wie ich de gezèt oet hej, leet ich ze mit 'n gerösj hert sjtaon en pakdje mich 'ne biebel van 't sjaap dae ich jaore trök mit väöl plezeer 'ns loos. Dae góng neet euver God, Jahweh, Boeddha, Allah, Zeus, Wodan of Osiris of num mer op wo zoeë al in geluifdj en veur gebaedj wurtj of oeëts wórt, mer euver 't Pastafarisme. 'n Religie die werreldwied mieër en mieër geluivige zele wètj te trèkke. 't Drejt allemaol óm 'n Vlegendj Sjpaghettimónster det oeëts 'ns aan emes versjeen en gèn 10 geboje aanbooj mer 8 'lever neetjes'. 't Zèsdje daovan sjprook mich waal aan: "ich höb lever neet det se veur multimiljoene euro's aan kèrke, moskeeje of tempels boews, mer besjteej det geldj aan 't besjtrieje van ermooj, krenkdjes en hónger mer veural aan laeve in vrede op dizze werreld".

Mit det book inne henj mós ich dinke aan wie, ouch alweer get jaore haer, twieë Jehova's getuge ane deur sjtónge. Ich vónj 't good det ze mich 't eint en 't angert zówwe gaon vertèlle euver häöre Jehova mer, ónger de veurwaarde det ich häör den ouch get euver mien geluif móch biebringe. Zoeë gezag zoeë gedaon. Wie ich aevel miene biebel oet de bokekas haoldje, verangerdje de sfeer. Waat ich waal neet dach waem zie waal neet wore óm zich zónne ónzin te mótte aanhuuëre. Gèn 'lever neetje' mer 'ne dieke 'lever neet', 't polariseerdje zègk mer. Nag gèn half minuut naodet ich die vraog trök hej gesjpeeldj, sjtónge ze mit oetgesjtreke gezichter en sjtriedkrete inne henj bie de bure ane deur. En geluif 't of neet, ich höb ze noeëts mieër gezeen

 

Allè,
 

Jan Sjure,
 

reagere: jan.sjure@druimentaere.nl

? Henderson B. The Gospel of the Flying Spaghetti Monster. 2006, Harper Collins Publishers London.