J'en r?ve d?j?

Zónjig 14 juli, Quatorze Juillet, saoves óm 9 oer in Berlien: 'n druimfinale, de Franse taege die van ós. 't Lèste tikske det Hernandez de Portugeze goof, hólp de Franse in idder geval 'n sjtökske wiejer op waeg. Noe die van ós nag vanaovendj. Op de nationale Franse fieësdaag zów det natuurlik 'n geweldige aafsjloeting zeen van 'ne daag dae sjmiddigs zoeëwiezoeë sjpektakel geit oplevere. Nao diek 180 kilomaeter mit 4 berg vanne ieëste categorie, moge de renners inne Tour d'r nag ènne vanne boetecategorie op. Frankriek en Nederlandj gaon dao waarsjienlik neet es ieëste baove kómme; det sjpektakel wurtj haopelik saoves oetgevóchte. Den haop ich det ós lieëwe 't opnumme taege de Franse hoonder; ós 'roeëd-wit-blaw' taege häör 'bleu-blanc-rouge'; ós 'oranje baove' taege häör 'allez les bleus'.

Ouch Lin haet dit jaor ziene Quatorze Juillet. Ózze Merteshaof wurtj daen daag 'Cour Martin' of wie zich dao al 'n tiedje luuëtj laeze de 'Place de la Petanque'.Wie kóns se zónne daag baeter viere es mit ein vanne meis beoefendje sjporte in Frankriek. De Franse numme 't 'petanque', inne meiste anger lenj hètj 't geweun 'jeu-de-boules'. In idder Frans gehuch is inne sjeem van get platane waal 'n 'place de la petanque' te vinje wo de oetdrökking 'laeve wie God in Frankriek' liek te zeen oetgevónje.

Op 'l'après-midi', ózze naonammedig vanne Quatorze Juillet is dae sfeer te preuve inne sjeem van 'n paar flinke buim op Merteshaof. Buieradar veursjpeltj noe al prachtig waer; de lóch kluuërtj blaw, 'le ciel devient bleu'. Alle ingrediënte óm ós op te werme veur de finale van saoves zeen de Quatorze Juillet te vinje in eige dörp. Allein vanaovendj nag efkes winne vanne Turke, haope det de Franse dinsdig 'viande hachée' vanne Sjpanjole make en det die van ós goonsdig de Ingelse nag ins trök aan häöre Brexit laote dinke. Mót lökke toch, n'est-ce pas? Druimentaere 'j'en rêve déjà'.

Allè,

Jan Sjure,

reagere: jan.sjure@druimentaere.nl

Deel dit bericht: