Mit van doon

Ich weit neet of 't get van doon haet mit waat ich hie vurrige waek sjreef, mer wie ich gisteraovendj de Waerd inleep woor ich aangenaam verrasj det ich geweun weer 'ns aojerwèts euver de sjtoep kós loupe. De welig tierendje netele wore vakkundig euver de vol brèdje trök gesjneujdj. De kèrkberg d'r naeve woor den nag waal groeëtendeils euverwoekerdj door die eigeste en bekans twieë maeter hoeëg brandjnetele, d'r tösse door wore aevel sjoeën wit bleujendje akkerwindes zichbaar die zich wie liane door det oerwoud netele sjlingerdje en zoeë lete zeen det 't waal good kumtj mit 't bioverdere oppe Maasgouw.

Ich hej ouch gèn benul of de vaere die ich vurrige waek inne vot van Remuunj sjtook dao aangekómme zeen of det 't d'r mit van doon hej det die van Lin d'r zoeë gled gesjaore bieloge. Remuunj trók de aafgeloupe daag al waat mer mejje kós oet de kas en óntdeej zien berm van al waat mer baove 't mejveldj oet dörfdje te kómme. Gèn päölke wórt euvergesjlage en kin weer toet ane veut bewónjerdj waere. Al waat dao vurrige waek nag welig zie gengske kós gaon, ligk noe waarsjienlik örges op 'ne composhoup te versjlakkere.

't Is mich get mit ós biodiversiteit. Nao alles waat ich d'r de lèste waeke euver sjreef en van zoog, haet 't d'r alles mit van doon det 't idee d'r achter mich baove de patsj oet greujtj en d'r wiejer gèn waord mieër aan voel gaon make.

Allè,

Jan Sjure,

Reagere: jan.sjure@druimentaere.nl

Deel dit bericht: