Nag aeve wachte

Vanne waek mós ich nag 'ns in Wieërt zeen en ómdet ich d'r vanoet Remuunj haer mós, ging ich euver de N280. Ich woor d'r al 'n jaor of vief, zès neet mieër gewaes. Net veurbie de rotonde in Baoxem móch ich aansjloete in 'n rie die, wie 't zich nag net inne verdje leet aanzeen, wórt aangeveurdj door 'ne tractor dae zien leidersrol toet wied achter Kelpe wis vol te haoje. De 15 kilomaeter tösse de A73 bie Remuunj en de A2 bie Kelpe huuëre al jaore bie de gevieërlikste van Limburg en d'r wurtj al aeveväöl jaor gesjtraeveldj óm d'r get aan te gaon doon. Wie ich d'r mich diswaek weer 'ns vasreej, vroog ich mich allein mer aaf wienieë.

Dónderdigmörge móch ich op bladzie 4 inne gezèt vanne hood en ziene randj móch laeze. Waat ieës 90 miljoen zów gaon koste, wórt in 2019 al 'ns opgesjroef toet 112 en noe mer leefs nao 133 miljoen en 't blief dao geweun 'nag aeve wachte' dus. Es Linnenieër zal 't mich ieërlik gezag wórs zeen wie lang det 'aeve' dao nag geit doere. Ich gaon waal via de Baek es ich weer 'ns in Wieërt mót zeen. Es ich 't disdaag aevel veur 't zègke hej gehadj, hej ich veur 'n paar hóngerd euro get bördjes 'verbaoje veur tractore' besjtèldj.

Ouch euver 'nag aeve wachte' en ouch euver mieër geldj góng 't op bladzie 5 van die eigeste gezèt. V'r mótte hie in Lin 'nag aeve wachte' op 't besjloet van ós gemèndjeraod toet v'r wete of, en zoeë jao veur wieväöl, de Maasgouw zich de Harmoniezaal aan geit sjaffe. En det neet allein, d'r zal hieël terech onnag get geldj bie mótte óm 'ne nuje beheerder alles op te laote sjtarte. En of de raod det euver 'ne daag of tieën noe achter gesjlaote of aope deure geit besjlisse, maak mich neet oet. 't Wurtj aevel langzamerhandj 'ns tied det aan 't 'nag aeve wachte' op good nuuts euver 't wie, 't waat en veural 't wienieë van ós gemeinsjapshoes 'n inj kump. Haopelik luuëtj de raod zich ein les lieëre vanne N280. Van 'nag aeve wachte' wurtj alles allein mer duurder.

Allè,
Jan Sjure,

reagere: jan.sjure@druimentaere.nl

Deel dit bericht: