terug
Druimentaere
Deel dit bericht:
Sjoe?n fie?ske
Druimentaere't Is alweer gans get jaore trögkes det ich op 'ne leedjesaovendj vanne Kwekkerte drie Linner maedjes ónger de naam 'de chicks' 'n leedje huuërdje zinge. Ich weit of 't de titel van 't leedje woor, mer ein zinke is altied blieve hange: 'veer haje waal van feeste'. Veur mich woor det zinke 't ieëste veurteike det ós Lins hel achteroet aan 't gaon woor. V'r 'haoje waal van fieëste' in ónvervalsj Remuunsj bie de Kwekkerte. Meh neet allein ós Lins is aan 't erodere, 't hieël Limburgs haet d'r las van. Ich sjreef hie eder dit jaor det det ós provinciaal besjtuur dees coalitieperiode idder jaor 1,1 miljoen euro zów gaon investere óm 't Limburgs te bevordere.
De mieërderheid vanne fracties hej zich d'r euver geëinigdj det 't Fries ós groeëte veurbeeldj woor en get krete in gezètte in januari en februari lete nieks te raoje euver. Óm d'r 'n paar te numme: 't Limburgs mót de eigeste sjtatus kriege es 't Fries; dink Fries en kal Limburgs; Limburgse les op idder sjoeël. V'r zeen noe 'n diek half jaor wiejer en dus moogs se aannumme, 'n diek half miljoen ermer. Ich weit neet wo überhaupt al geldj aan is oetgegaevem mer recent trok 'n ganse bös vol besjtuurders same mit leje van Veldeke, de Limbörgse Academie en de Raod veur 't Limburgs richting 't belaofdje (Fries)landj. Ze zeen, loos ich, hieël get wiezer gewaore op die reis. Net wie Limburg haet ouch Frieslandj 'n rieke sjakering aan lokaal dialecte, mer wo 't Fries 'n gesjtandaardiseerdje sjpelling haet, sjrieve de Limburgers wie 't häör oetkumtj. Det hej ich häör ouch in Lin kónne vertèlle.
De sjónste versjille aevel koom ich neet taege in de reisversjlage die ich loos. Die vónj ich in 'n óngerzeuk nao tale en dialecte in Nederlandj det in 2021 door 't CBS wórt gepubliceerdj. Vanne Frieze kaltj 40 procent thoes Fries, vanne Limburgers duit mer leefs 48 procent det in 't Limburgs. Waat det betruf laote v'r de Frieze 'n ech puupke ruke. En al geit ós Lins hie en dao mieër en mieër Remuunjse trèkskes kriege, veur mich zów det 'n reje veur 'n 'sjoeën fieëske' kónne zeen. En zoeëlang v'r dao gein 'cool party' van make, moog det van mich ouch gerösj 'n 'sjoon feeske' zeen.
Allè,
Jan Sjure,
reagere: jan.sjure@druimentaere.nl
De mieërderheid vanne fracties hej zich d'r euver geëinigdj det 't Fries ós groeëte veurbeeldj woor en get krete in gezètte in januari en februari lete nieks te raoje euver. Óm d'r 'n paar te numme: 't Limburgs mót de eigeste sjtatus kriege es 't Fries; dink Fries en kal Limburgs; Limburgse les op idder sjoeël. V'r zeen noe 'n diek half jaor wiejer en dus moogs se aannumme, 'n diek half miljoen ermer. Ich weit neet wo überhaupt al geldj aan is oetgegaevem mer recent trok 'n ganse bös vol besjtuurders same mit leje van Veldeke, de Limbörgse Academie en de Raod veur 't Limburgs richting 't belaofdje (Fries)landj. Ze zeen, loos ich, hieël get wiezer gewaore op die reis. Net wie Limburg haet ouch Frieslandj 'n rieke sjakering aan lokaal dialecte, mer wo 't Fries 'n gesjtandaardiseerdje sjpelling haet, sjrieve de Limburgers wie 't häör oetkumtj. Det hej ich häör ouch in Lin kónne vertèlle.
De sjónste versjille aevel koom ich neet taege in de reisversjlage die ich loos. Die vónj ich in 'n óngerzeuk nao tale en dialecte in Nederlandj det in 2021 door 't CBS wórt gepubliceerdj. Vanne Frieze kaltj 40 procent thoes Fries, vanne Limburgers duit mer leefs 48 procent det in 't Limburgs. Waat det betruf laote v'r de Frieze 'n ech puupke ruke. En al geit ós Lins hie en dao mieër en mieër Remuunjse trèkskes kriege, veur mich zów det 'n reje veur 'n 'sjoeën fieëske' kónne zeen. En zoeëlang v'r dao gein 'cool party' van make, moog det van mich ouch gerösj 'n 'sjoon feeske' zeen.
Allè,
Jan Sjure,
reagere: jan.sjure@druimentaere.nl
Deel dit bericht: