Vrieheid

Wie ich diswaek 'n foto inne gezèt zoog sjtaon van 't gewaer van wo-oet 'ne kogel zich door 't oeër van Trump baordje, kós ich 't neet laote óm 'ns te googele nao dae AR-15; Maorloeët waat 'n apparaat; de Amerikaanse oetveuring van de Kalashnikov. Veur 'n gooj 900 euro te koup en 20 miljoen Amerikane sjiene 'm op häör nachkeske te höbbe ligke. Mit vanne sjónste redeneringe óm 't allemaol 'n bietje good te kalle, huuërdje ich d'n daag nao de aanslaag op Trump: "mer good det veur iddere gek dae mit zoeë'ne AR-15 róndjlöpt, d'r ouch twintjig luuj mit gooj bedoelinge zeen die euver det waope besjikke".

Wiejer googelendj vónj ich 'n euverzich van gewaopendje massa-aansjlaeg in Amerika*. De lèste complete maondj woor dae van aafgeloupe juni: mer leefs 78 aansjlaeg mit 458 doeëje en gewóndje. Waat 'n landj, Biden haet veurnummes de verkuip vanne AR-15 aan benj te lègke; Trump vintj 't allemaol waal good zoeë. Kóm in godshieëresnaam neet aan ós verworve vrieheid.

Veur al die luuj dao mit zónne AR-15 op 't nachkeske is d'r good nuuts. 'ne Waopefabrikant, WEE1 Tactical, geit 'n miniversie oppe mert bringe zoeëdet aojers häör kinjer op 'n veilige meneer kónne lieëre ómgaon mit häör verworve vrieheid. 't Gewaer, de JR-15, zuutj 't zelfdje oet, veultj 't zelfdje aan en wèrktj 't zelfdje es det van pap en mam. 't Is allein get kleiner, waogtj mer eine kilo, d'r kinne mer 20 keugel in en 't is te kriege in versjillendje kindjvruntjelike kluuëre. En 't allersjónste van dit geweldige nuuts: 't gewaerke kosj mer 'n gooj 350 euro. Vrieheid baove alles mót veur idderein betaalbaar blieve. God bless America.

Allè,

Jan Sjure,

reagere: jan.sjure@druimentaere.nl

* https://en.wikipedia.org/wiki/List_of_mass_shootings_in_the_United_States_in_2024
** https://www.barrons.com/news/us-gunmaker-unveils-semi-automatic-rifle-marketed-to-kids-01645236607

Deel dit bericht: