Zörg óm zorg

Drie kieër 'n 'o' inne titel en 'n stjtreepke en 'n trema zörge veur drie versjillendje klanke. In sjoeën klinkendj Limburgs is d'r amper 'ne sjondere titel te verzinne. Eigelik hej hiebaove 'zörg óm zorg (6)' mótte mótte sjtaon. Wie ich nag idder waek 'ne column inne Limburger sjreef, gebroekdje ich det köpke al vief kieër eder. De viefdje sjtóng oppe kop aaf tieën jaor geleje inne gezèt. In die vief vurrige columns maakdje ich mich veural zörg euver de veiligheid en toekóms van waat oeëts collega's wore, de verpleegkundige dus.

Tieën jaor aojer en dus sjtatistisch gezeen tieën jaor doonder bie oeëts 'ns zörg nuuëdig te höbbe, maakdje ich mich aafgeloupe waek bès waal zörg euver de zorg die ich meugelik oeëts nag 'ns moog gaon consumere. Zoeë loos ich dinsdig inne gezèt det personeel inne zörg tieën jaor geleje alles mós doon óm aan 'n baan te kómme, terwiel d'r vandaag d'n daag inne vief Limburgse ziekehoezer bekans 500 vacatures veur verpleegkundige en artse neet ingevuldj kónne waere. En wiejer óngerzeuk luuëtj zeen det vanwaege de toenummendje wèrkdrök driekwart van 't personeel d'r aan dinktj van baan te verangere.

Väöl veróntröstendjer nuuts brach de Limburger dónderdigmörge. Door de vergriezing, wo ich euveriges nag jaore aan haop mit te moge wèrke, zal 't aantal aojere det in Nederlandj euver vieftieën jaor zörg nuuëdig geit höbbe mit mer leefs 66 percent toenumme. V'r gaon den mer leefs 110.000 extra zörgplekke nuuëdig höbbe mit daobie 315.000 extra zörgprofessionals. 'n Paar etages baovenop Maartenshof zal boewtechnisch nag waal lökke tunk mich. Wo v'r taege daen tied aevel die 630.000 extra henj zorg vanaaf gaon haole, liek mich 'n grótter probleem. Es ich den onnag 'ns huuër det ós nuuj regering sjtructureel investeringe in de zörg veur aojere haet oetgesjtèldj en zich inne wiedste wiedje neet drök liek te make euver dit eint en angert, wurtj 't gaondjeweg de hoeëgste tied veur get zörg óm zorg.

Allè,

Jan Sjure,

reagere: jan.sjure@druimentaere.nl